Cemawerê xweştiviyê kurdistanê

Îro ji aliyê hinek part û rêxistinên naskirî ve xwepêşandanek li nav bajêrê Silêmaniyê çê bû, ku wek çawa di daxwaza rêxistinkarên vê xwepêşandanê de hatibû, gerek bû bi armanca hinek daxwaz û piştevanîkirina guherînên Tûnisê û Misirê baya, belê berê vê xwepêşandanê bi serkêşiya hinek ajaweyan, ket baregeha liqa çarema PDK de û di nav van xwepêşanderan de, çekdar jî hebûn û piştî ku kevir havêjtin baregah liqa çar, êrîşî liqa çar jî kirin.

Ji ber ku dam û dezgehên ewledariyê yên berpirsyar jî rola xwe ya pêwîst nedîtin, ew hêzên pasevanên ewledariyê yên biçûk ên ku ji bo paraztina liqê hatibûn destnîşankirin, bê çare man û bergirî di ber baregeha liqê de kirin. Di encam de – mixabin – çend êrîşkar hatin hingavtin.

Hêjayî gotinê ye, ku em ji berî çend rojan ve agahdar bûn, ku bizavek bi goman û ajaweyane li parêzgeha Silêmaniyê li dijî PDK dihat kirin. Di nav van anarşîstan de alîgirên part û rêxistinên naskirî hene û mixabin, ku hêzên asayişê û polîsên nav bajêrê Silêmaniyê, ti bergirî di ber baregeha liqa çarema partiya me de nekirin û dev jê berdan, ku berê xwepêşanderan li angora daxwaza ajaweyan biçe û rêya xwepêşandanê kontrol nekirin.

Herwek xuyaye, ku li gor yasaya rêxistina xwepêşandanê, nabe xwepêşander û rêxistinên dijî dam û dezgehên fermî û partayetî bizavan bikin û dijwariyê bi kar bînin, belê ew a Îro li Silêmaniyê li dijî baregeha liqa çarema partiya me çê bû, berûvajî vê yasayê bû.

Em wek Partiya Demokrata Kurdistanê daxwazê ji dam û dezgehên fermiyên Silêmaniyê dikin, ku ewledariyê biparêzin û bi erkên xwe rabin. Herweha, em daxwazê ji aliyên siyasî û cemawerê xweştiviyê nav bajêrê Silêmaniyê dikin, ku erkên xwe yên niştimanî yên ji bo parastina hêminiyê û selametiya dam û dezgehên siyasî û hikûmî bi cih bihînin û nehêlin, ku ajawe û kesên gomanbar planên xwe yên dijî berjewediya welatê me bi cih bihînin, çimku di dawî de ziyan digihêje ser û samanên hevwelatiyan û dam û dezgehên wan.

Cemawerê xweştiviyê xelkê kurdistanê; parastina ewledarî û destkeftên neteweyî û demokratîkên me, erkê hemû çîn, nifş, part û rêxistinên cuda ye û em çaverê ne, ku cemawer bi erkê xwe rabe û baregehên hemû aliyên siyasî, pêkhatên cuda û dezgehên hikûmî biparêze û rê nede ku ajawe belav bibe.

Em wek PDK daxwazê ji hikûmeta herêma kurdistanê dikin, ku komîteyeka lêkolînan pêk bîne û bi zûtirîn dem, encamên karê xwe bixe ber çavê xelkê kurdistanê de û fitnekarên bûyera nav bajêrê Silêmaniyê, aşkira bike û wan li ber yasayê dane.

Herweha, em pîkolan dikin û hemû şiyanên xwe bi kar dihînin, da ku em rewşê kontrol bikin, destkevtan biparêzin û yekrêziya millet jî biparêzin.