Polîsên Swêdî duhî bi şev (17.02.2011ê) 15 penaberên İraqî vegerandin İraqê. Ji derveyî vê yekê polîsên Swêdê gotin: “Nêzîka 150 kesan li pêşiya wê kampa ku ev penaber lê bûn, li dijî dersînorkirina van penaberan xwepêşandanek li darxistin.”

Li gor raporteke malpera swedishwire.com a Swêdî, polîsan daxwaz ji meşvanan kiriye ku pêşiya kampê vala bikin, dema ku xwepêşander ew cih vala nekirin, polîsan dest bi pêngava girtinê kirin û 16 çalakvan girtin.

Derbarê dersînorkirina 15 penaberên İraqî de jî, polîsên Swêdê di daxuyaniyeke fermî de daxuyandin: “Li gor wê plana ku me dariştî, firokeya ber bi Bexda ve çûyî, di demê xwe de bi rêket. Biryara dersînorkirina van penaberan ji aliyê desteya karûbarên penaberan a Swêdê ve hat dayîn.”

Hikûmeta Swêdê bi berdewamî ji aliyê rêxistinên Human Rights Watch, Amnesty û Unicef ve bi boneya dersînorkirina penaberên İraqî tê rexnekirin.

Her li gor wê raporê, Hikûmeta Swêdê berî mehekê 26 penaberên din ên İraqî dersînor kir. (Rûdaw)