Serokê herêma kurdistanê Mesûd Barzanî li bajêrê Selaheddîn, pêşwazîya balyozê Brîtaniya yê li Iraqê û şandeya pê re kir. Konsulê giştîyê Brîtaniya yê li bajêrê Hewlêrê û generalê Brîtaniyayî Maks Marîna jî, di evê dîdarê de amade bûn. Di evê dîdarê de behsa rewşa siyasîya evroja Iraqê û herêma kurdistanê hat kirin û bi taybetî jî, behsa peywendîyên nvabera Iraqê-herêma kurdistanê û Brîtaniya hat kirin.


Di vê dîdarê de ya ku doh hat sazdan, guft û go di bareya encûmena stiratejîka Iraqê de hatin kirin û hat daxwazkirin, ku ew pirs û arêşeyên heta niha di navbera Iraqê û herêma kurdistanê de nehatine çareserkirin, êdî bihên çareserkirin.

Balyozê Brîtaniya yê li Iraqê da nîşandan, ku nerîna serokatîya siyasîya kurd a di bareya ayindeyê (paşeroja) Iraqê de rohntir û zelaltir e û da nîşandan, ku Brîtaniya bi hemû awayan piştgirîya prosesa siyasîya Iraqê û herêma kurdistanê dike.
Di bareya peywendîyên navbera Brîtaniya û herêma kurdistanê de hat daxwazkirin, ku ev peywendîyên han xurttir û berfirehtir bibin. Balyozê Brîtaniya yê li Iraqê spasîya serokê herêma kurdistanê û hukûmeta herêma kurdistanê jî kir, ji ber ku ew evan peywendîyan ber bi pêştir ve dibin.

Serokê herêma kurdistanê di evê dîdarê de behsa rola kurd a di biwarê pêkanîna hukûmeta nû ya Iraqê de kir û got, ku ew dê bi hemû awayan pîkolan bike da ku prosesa pêkanîna hukûmeta nû ya Iraqê bi dawî bibe û serkevtî be.