Di encamnameya Konferansa Kurdî ya Navneteweyî ku li paytexta Belçîkayê Brukselê, di Parlamentoya Ewropayê de hatibû lidarxistin hate xwestin ku, bo çareserkirina pirsgirêka kurd, Tirkiye gavên demokratîk bavêje.

Li gor AKnews`ê Encamnameya Konferansa Kurdî ku li Brukselê roja çarşemê hatibû lidarxistin, biryarên ku hatin girtin bi kurtî, ev bûn:

- Divê Yekitiya Ewropa (YE), bo ku hê zêde reforman bike û Krîterên Kopenhagê bîne cih, ser Tirkiyeyê zext bike.

- Divê Tirkiye, standardên mafên mirovan ên navneteweyî ku derbarî pêşîlêgirtina êşkenceyê û binçavkirinê pêk bîne.

- Astengiyên ser azadiya raman û îfadekirinê divê bêne rakirin.

- Divê YE, bo aştiya kurd û tirkan, diyaloga navbera kurd dewleta Tirk teşwîq bike û alîkarî bike.

- Dewletên YEyê, şûna ku xebat û hewladanên demokratîk û aştiyane yên rêxistinên kurdan ku li Ewropayê ne krîmînalîze bikte, divê piştgirî bide.

- Divê, YE, hewl bide ku, benda hilbijartinê ya ji sedî 10ê ya Tirkiyeyê bête daxistin.

- Divê Tirkiye, Peyvnameya Çarçoveya Ewropayê ya Derbarî Parastina Hindikahiyan bipejirîne û bo mafên kulturî yên hemû koman rêzdar be û bo perwerdeya zimanê dayikê gav bavêje.

- Li Tirkiyeyê rîska tundiyê bilind e û divê rewşa jinan li wê derê bête başkirin.

- Divê vegera kesên ku ji ber pevçûnan neçarî berdana gundên xwe mane, bête temînkirin.

- Divê Tirkiye, hemberî biryara agirbestê ya PKKê û yekparebûna axa Iraqê rêzdar be û bo vê bombardimanên ku ser Herêma Kurdistanê dike bi dawî bîne û operasyonan rawestîne.

- Siyasetmedarên ku ji Doza KCKê tên darizandin, divê serbest bêne berdan.

- Ger Tirkiye, berpirsiyariyên xwe anîn cih, divê welatên endamên YEyê, Tirkiye li derve nehêlin.